Pormal na nga ginbuksan sang provincial government ang gintukod nga Maragtas Souvenir Shop sa atubangan sang Kapitolyo probinsyal sang Lunes nga adlaw Marso 27.
Ginpangunahan ni Vice Governor Mitang Magbanua ang pagbukas sang nasambit nga tindahan kadungan sang Women’s Month Culminating Activity.
Kabahin ini sang mga aktibidad sa palaabuton nga Capiztahan 2023 bangud diri makita ang mga ginapasundayag nga produkto nga ginpili agud ipakita ang manggaranon nga kultura kag panublion sang probinsya.
Sa mensahe ni Governor Fredenil Castro, ginganyat niya ang tanan nga pumuluyo nga suportahan ang Souvenir Shop kag Capiztahan 2023 kay wala na sang iban pa nga magasuporta sini kundi kita man nga Capiznon.
Ginhinyo pa ni Castro, nga ipasundayag sa nagkatuhay nga social media ang mga ini para madamo ang makakita kag magkainteres sa pagahiwaton nga selebrasyon sang Capizthan.
Dugang pa sang gobernador, pinaagi sa social media mapalab-ot sa tanan ang bugana nga turismo sang Capiz ang naangut sa pangabuy-anan sang mga pumuluyo sini.//KMD Gicalde