MALAMPUSON nga gipahigayon ang Market Launch sa Multi-Billion 150MW Agrovoltaic Solar Power Plant sa Purok Nopol, Guadalupe, Brgy. Conel, Gen. Santos City.
Ang maong proyekto ang gipangunahan sa Embrace Nature Power One Corporation ni Yan Amante ang CEO/President sa maong korporasyon. Gitambungan kini sa pipila ka mga personahe ug opisyal gikan sa managlahing electric cooperative sa Mindanao, Mga kapitan sa Barangay Conel ug Barangay Mabuhay ilabi na ang personahe gikan sa City Environment and Natural Resources Office kon CENRO.
Gibutyag ni Yan Amante, nga ang proyektong 150MW Agrovoltaic Solar Power Plant ang gigahinan og 190 hectares nga luna sakop sa nasampit nga mga Barangay.
Gawas sa renewable energy mamahimong makaabag usab matud pa ang maong proyekto sa pagkunhod sa power cost ug mamahimong 5.90 pesos na lamang ang Generation rate sa mga konsyumante,Pag-hatag og proyektong agrikultural ug pag pakusog sa turismo sa Gensan.
Kahinumdumang sa unang mga gihimong panagpulong givbutyag nga mukabat sa dili muubos sa 200,000 solar panels ang planong ipangmuntar alang sa maong proyekto. Sa pakighinabi sa Brigada News Team sa Presidente sa Philippine Association Board of Directors of Rural Electric Cooperative nga si Al Castillon nga hugot ang ilang ipakitang suporta sa Embrace Nature Power Corp. ug gi-angkon niining mas kinahanglan sa kasamtangang panahon ang renewal energy.
Samtang dakong kalipay ug gipasigarbo ni Barangay Conel Kapitan Luciano Palma nga apil ang iyang Barangay sa maong proyekto tungod gawas nga makatabang kini sa pag kunhod sa presyo sa kuryente mamahimong makahatag usab kini og trabaho nga residente sa iyang Barangay. Laomang masugdan ang operasyon sa 150MW Agrovoltaic solar power plant sunod tuig 2024. I MJ Fernandez