-Reymund Titong
KABANKALAN CITY, Negros Occidental — Maka-alarma sa karun sang resulta sang water test sa porsyon sang Ilog-Hilabangan river sa Sitio Malabong, Barangay 2, banwa sang Ilog, bangud sa mataas sini nga chlorine level.
Pahayag ni Lucia Salazar, ang Supervising Environment Specialist sang Department of Environment and Natural Resources – City Environment and Natural Resources (DENR-CENRO) sa Kabankalan, ang resulta sang water test nga ginpalab-ot ni Ilog-Barangay 2 captain Nick Lopez, ang nagapakita nga ang suba sa karun ang may mataas nga chlorine content, ukon ang chemical nga ginagamit nga bilang disinfectant.
Suno kay Salazar, base sa iya nakuha nga impormasyon nahanungod sa normal nga water testing results, ang normal nga chlorine level sa tubig ang yara lang dapat sa 250 mg/L, apang ang resulta sang water test sa suba ang nag lab-ot na sa 620 mg/L.
Samtang, plano naman nga diskusyonan sang DENR-CENRO kaupod ang apektado nga barangay kag ang Bureau of Fish and Aquatic Resources (BFAR) ang natabo nga insidente agud ma-sekyar kun sa diin nag halin ang amo nga kemikal nga naga-apekto sa mga isda sa lugar.
Una na nga ginpahayag ni kapitan Lopez nga duwa na ka beses nga iya personal nga nakita kun paano naglinutaw ang mga isda sa suba gina-alegar. Iya man sini ginpabutyag ang mga kabudlayan sang mga pumuluyo kag kapin 40 ka mga mangingisda nga naga-sandig sang ila pangabuhian sa suba.
Para naman kay Pierre Gabriel San Jose, isa ka biologist kag manunudlo nga may adbokasiya nga proteksyunan ang dunang manggad, iya gin pahayag nga ang prisensya sang mataas nga lebel sang chlorine sa suba ang “makatuga sang pagkapatay sang mga isda bangud sang respiratory problem kag suffocation.”*