Human nakatagamtam og kagawasan gikan sa Communist Party of the Philippines-New People’s Army-National Democratic Front (CPP-NPA-NDF), gilusad sa Matigsalug tribe sa Marilog, Davao City sa pinakaunang higayon ang flag raising ceremony.
Sumala kang Brig. Gen. Filmore Escobal, Regional director sa Police Regional Office-XI, makasaysayanon ang pinakaunang seremonya kung asa gikanta sa tribo ang “Lupang Hinirang”.
Ang Barangay Tamugan sa Marilog ang pinuy-anan sa Matigsalug tribe nga pila ka dekadang kontrolado sa CPP-NPA-NDF apan diihang naabot ang mga sakop sa Revitalized Pulis sa Barangay nabati ang hinay-hinay nga kausaban.
Pipila sa mga tribo ang mga myembro sa Pulang Bagani Command sa CPP-NPA-NDF nga nagdomina sa lugar sukad niadtong 1990.
Resulta matud pa sa gipakitang sinseridad sa tropa sa gobyerno, mag programa ug proyekto nga gihatud sa ilang komunidad sama sa farm to market roads, health and sanitation facilities, electrification, national greening, health stations, livelihood programs mao ang pagsurender sa 38 ka regular NPA member.
Dugang ni Escobal, ang Brgy. Tamugan ang kabahin sa 215 nga priority barangays nga natumbok sa National Task Force to End Local Communist Armed Conflict (NTF-ELCAC) pinaagi sa gipakatag nga RPSB members nga inisyatibo sa PRO-XI.
Kahibaluang base sa NTF-ELCAC, anaa sa P20milyones ang gitaganang pondo alang sa NPA-infested barangay pinaagi sa Barangay Development Program (BDP). BNFM-DAVAO
