Wala sang may nabaton nga pamahog ukon ‘death threat’ si Dumarao Mayor Mateo Hachuela antes natabo ang pagpalupok sang granada sa kilid sang iya puluy-an sa Brgy. Poblacion Ilaya sa nasambit nga banwa, pasado alas 8:00 sang gab-i sadtong tinalikdan nga adlaw sang Sabado, Agosto 5.
Ini ang iya ginpahayag sang ma-interview sang Brigada News FM Roxas City.
Suno kay Hachuela, wala niya ginalauman nga granada ang naglupok sang matunog bangud sa iya pagdumduom fireworks lang ini kay nagaselebrar sila sang kapiestahan sa ila nga banwa.
Dugang pa sini, makabig kuntani nga generally peaceful ang selebrasyon sang kapiesthan kun wala lang natabo ang pagpalupok sang bomba sa iya puluy-an.
Ginpahayag man sang alkalde nga may yara na sang “lead” ukon person of interest ang mga kapulisan sa nasambit nga hitabo pinaagi man sa kuha sang CCTV sa lugar.
Nahibaluan nga indi lang ini ang una nga beses nga natabo sa lugar ni Hachuela bangud sang nagligad nga eleksiyon may nagpalupok man sang armas-luthang sa atubang sang ila puluy-an.
Sa karon, padayon pa ang pag-validate sang mga otoridad sa may kahimuan sang krimen agud matumod ang motibo kag mapasakaan sang nagakaigo nga panumbungon. | Judy Ann Juare