Nabalaka si Davao City Mayor Inday Sara Duterte-Carpio sa subling pagdaghan sa ihap sa COVID-19 cases sa syudad.
Sigon sa Mayor, base sa representasyon sa City Health Office kaganihang buntag, gikan sa kapin dos syentos ka kaso sa miaging semana nisaka karon sa kapin kinientos ang aktibong kaso butang nga gikaalarma niini.
Nigawas nga dunay mga Covid 19 outbreaks ug clustering sa mga kaso ilabi na sa mga workplaces, pampubliko ug pribadong mga opisina, ug mga establisyemento.
Hinoon giklaro nga dili pa kini matawag nga surge apan usa lamang kini ka pre-surge hinungdan nga doble ang paningkamot sa buhatan nga pangitaon ang mga tao nga posibleng natadakdan na sa kagaw pinaagi sa hugtanong contact tracing gawas pa sa surveillance testing sa mga high risk sector.
Kahibaluang una nang gikanayon ni CHO Acting Head Dr. Ashley Lopez nga usa sa nakapataas sa kaso mao ang surveillance testing. Tungod niini miapela sa publiko ang alkalde nga padayong sundon ang mga health protocols ug mga regulasyon nga mao lamang ang bugtong paagi aron dili matakdan samtang nagapdayon ang vaccination program sa lokal nga gobyerno.