Ginatugyan sang Alkalde sa Department of Education-Capiz ang imbestigasyon sa natabo nga indi maayo nga pagtratar sang isa ka manunudlo sa Person with disabilities (PWD) student sa Lonoy, Elementary School sa banwa sang Sapian.
Sa interview sang Brigada News FM kay Mayor Jose Villanueva, ginpahayag sini nga hatagan niya sang oportunidad ang DepEd nga mag-imbestigar bangud ang nagaguha palang dire amo ang side sang naga-complain kag wala pa nabatian ang side sang ginareklamo.
Suno pa kay Villanueva, bilang amay sang banwa iya obligasyon nga hibaluon ang kamatuoran kag kun ano ang nagakaigo nga solusyon sa amo nga problema para wala sang maguwa nga may ginadampigan.
Dugang pa sini, nagapati siya sa due process gani indi siya luyag nga maghatag sang komento samtang wala pa mahibaluan ang pahayag sang pihak nga bahin.
Nagpanugyan man ang alkalde sa nga manunudlo sa banwa sang Sapian nga ipabilin ang professionalism kag mangin pasensyoso sa mga estudyante kag naghatag man ini sang mensahe sa mga ginikanan nga mangin maintindihon sa mga sirkumstansiya kag indi gilayon maghatag sang reaksyon nga wala pa mahibaluan ang kamatuoran. | Judy Ann Juare