Mechanical error, rason sa bangga sa gensan – TEU

MECHANICAL Error, ang rason sa bangga nga gikamatay sa napulo katao ug gikasamad sa upat sa insidente sa Barangay Batomelong. Matud ni PLt.Col. Dominador Palgan Jr., labaw sa Traffic Enforcement Unit (TEU) nipis na ang ligid sa van nga gisakyan sa 14 katao nga nag-team building sa Samal island.

Posibleng wala nasuta sa drayber ang kondisyon sa sakyanan bag-o paman mibiyahe gikan GenSan padulong sa Samal. Dugang ni Palgan Jr., sa pamahayag sa usa sa nakaluwas paghawa nila sa GenSan nabati na niini ang problema sa ligid sa sakyanan.

Gisultian pa niini ang namatay nga drayber sa van nga si Noel Pudadera nga kini ang paghubsan og hangin. Hangtud nga sa pag-uli sa GenSan, wala na misakay ang maong tawo ug nagpahunong lang sa Davao aron adtoon ang anak.

Giangkon sa opisyal nga luyo sa makasusubo nga hitabo, walay mapasakaan og kaso tungod ang drayber sa van nga si Pudadero ug wing van nga si Cesar Andaya ang pulos patay sa insidente.

Tungod niini, subling miapela si Palgan Jr., sa mga motorista nga kanunay sutaon ang ‘blow bagets’ lakip na ang kondisyon sa panglawas sa mismong drayber. Kahibaloan nga mibuto ang ligid sa walang bahin sa likod nga van hinungdan sa pagsirko sa van padulong sa wing van nga naa sa pikas nga linya.