Medical frontliner, Warehouse Personnel asin Checker, kabali sa 6 na bagong kaso nin COVID-19 sa Catanduanes

BICOL—Suminangat na sa 322 ang kabilugang kumpirmadong kaso nin COVID-19 sa probinsya nin Catanduanes makalihis na madugangan nin anom na panibagong kaso nin helang ngunyan na aldaw.

Basado sa report kan Provincial Health Office, tolong kaso ang naidugang sa banwaan nin San Andres kabali ang 38-anyos na lalaking warehouse personnel gikan sa Brgy. Agojo, 49-anyos na baba gikan sa Brgy. Esperanza Poblacion asin 24-anyos na lalaking checker, residente kan Brgy. Timbaan.

Duwang kaso man ang naidugang sa banwaan nin Virac, ang mga ini iyo ang 49-anyos na babaeng medical frontliner gikan sa Brgy. Danicop asin ang 52-anyos na lalaking residente kan Brgy. San Roque.

Mientrastanto, sarong kaso man ang nairehistro ngunyan na aldaw sa banwaan nin Caramoran asin ini ang 56-anyos na babae na residente sa Brgy. Baybay.

Huli kaini nasa 50 ang aktibong kaso ngunyan nin COVID-19 sa Catanduanes mantang 265 naman ang mga nakarekober makalihis na madugangan nin siyam na mga narahay.

Puminakol naman sa walo ang COVID fatalities sa probinsya, kung sain ang 76-anyos nganing lolo gikan sa banwaan nin San Andres ang pinaka latest na binawian nin buhay sa probinsiya.##

Leave a Reply

Your email address will not be published. Required fields are marked *