Balhog na sa prisohan ang membro sa komunistang New People’s Army (NPA) human nadakpan sa otoridad diha sa Barangay Poblacion 2, lungsod sa RTR, Agusan del Norte kagahapon sa buntag.
Ang dinakpan nailang si Rondy Mandag, 37 anyos, aktibong sakop sa NPA Guerilla Front Committee 21C, Northeastern Mindanao Regional Committee ug nanimuyo sa Brgy. San Antonio sakop sa maong lungsod.
Gidakop si Mandag tungod sa duha ka ihap sa kasong pagpatay nga walay piyansang girekomenda, multiple attempted murder nga dunay girekomendang piyansa balor P120,000; ug kidnapping nga walay piyansang girekomensa sa Regional Trial Court 10th Judicial Region, Branch 3, Butuan City.
Sumala ni Police Brigadier General Romeo Caramat, Jr., ang Regional Director sa Police Regional Office (PRO) 13, si Mandag maoy isa sa mga ni-ambush sa tropa sa 29th Infantry Battalion Philippine Army samtang nagpahigayon kini’g Combat Security Patrol diha sa Brgy. San Antonio, sakop sa maong lungsod adtong Nobembre 2018.
Gawas nga nakapatay kini’g tulo ka mga sakop sa militar, gidagit usab nila ang membro sa CAFGU.