Arestado ang isa ka menor de edad matapos nadakpan nga nagapakiwal sang indi lisensyado nga armas luthang sa Barangay Poblacion Norte, Sigma, Capiz.
Sandig sa imbestigasyon sang Sigma Municipal Police Station, may nagreport nga isa ka concern citizen sa ila istasyon nga may yara sang menor de edad nga nagasukbit sang armas nga nasulod sa sling bag, samtang nagalibot- libot sa sulod sang merkado.
Gilayon naman nga ginpadulongan sang mga kapulisan ang lugar kag didto positibo nga nakuhaan sang 38 calibre nga armas luthang ang menor de edad nga wala na ginhingadlan kag naga-edad sang 16-anyos.
Nahibaluan nga ang nasambit nga suspek ang may mga kaso man sang pagpangawat sa nasambit nga banwa.
Sa karon, yara na sa kustodiya sang Sigma Municipal Social Welfare and Development Office (MSWDO) ang nadakpan kag natalana nga pasakaan sang kaso nga paglapas sa R.A 10591 ukon “Comprehensive Firearms and Ammunition Regulation Act.”