Mercedes idineklarang ASF free, restocking capacity sa mga farm pinapayagan na

CAMARINES NORTE- Deklarado nang African Swine Fever ( ASF) free ang bayan ng Mercedes, Camarines Norte.

Marso 15 pa nitong taon ang ASF Free status declaration na pirmado ni Mayor Alexander Pajarillo at Provincial Veterinarian Dr. Ronaldo Diezmo pero kahapon lang isinapubliko ng LGU.

Idineklarang ASF free ang naturang bayan batay sa administrative order no. 30 series  of 2021 o ang Guidelines  for Recovery and declaration of Freedom from ASF.

Ito ay makaraang ma-comply ng LGU ang mga kondisyon at kinakailangang requirements kabilang na ang aktuwal na pagkuha ng blood sample  sa mga alagang baboy na ipina-test pa sa regional office ng Department of Agriculture at iba pang dokumento.

Kung kaya  sa bisa ng Administrative order no. 22 series of 2020 mula sa Office of the President at Administrative circular no.12 series of  2019 ng DA ay  pormal nang ideneklara na ASF FREE na ang bayan ng Mercedes.

Mula sa pagiging RED zone o infected ng virus ibinaba na ito  sa  PINK zone na nangangahulugang maaari nang makapag alagang muli ng baboy ang mga farm at backyard hog raisers.

Ayon kay Mayor Pajarillo bagamat ASF free na ang kanilang bayan ay patuloy pa rin ang ginagawang monitoring ng Municipal Agriculture Office (MAO).

Hindi pa rin kasi tuluyang malaya sa banta ng ASF ang Camarines Norte lalo’t kamakailan lang ay muling nagkaroon ng panibagong kaso sa Sta Elena.

Gumawa na rin ng mga kinakilangang hakbang ang Provincial Government para mapigilan ang pagkalat ng virus.

Leave a Reply

Your email address will not be published. Required fields are marked *