Mga aborsyonista sa Cebu, sikop sa NBI-7

Lima ka mga tawo ang nadakpan sa mga sakop sa National Bureau of Investigation (NBI)-7, sa managlahi nga gihimo nila nga pagpanakop sa dakbayan sa Talisay ug dakbayan sa Sugbo.

Unang gisikop si Joey Guirigay kinsa giilang utok sa pagpangita  og mga gusto magpa abort o sa mga gustong magpakuha sa ilang gisabak.

Matud ni Atty. Renan Oliva sa NBI-7 nga kini migamit sa social media gamit ang laing pangalan nga pangalan sa usa ka babaye aron maka-agni og mga kustomer.

Samtang si Francisca Rebamonte ug Marytessie Rural maoy tig-hatud sa mga babaye nga gustong magpakuha sa ilang mga gisabak.

Usa ka Amparo Gemarangan 71-anyos mao usab mismo ang giingung tigkuha sa mga puya  gikan sa nga sabakan sa mga inahan diin ang maong suspetsado anaa magpuyo sa Barangay Mojon sa dakbayan sa Talisay.

Si Gloria Gabutin nga lakip sa mga nadakpan ang giingung tig abort usab sa mga bata ug kini anaa sa dan A.Lopez Barangay Labangon dakbayan sa  Sugbo.

Sa gihimong pagpaniid sa NBI-7, nasuta nga dugaydugay na ang maong mga abortionist sa ilang illegal  nga binuhatan.

Gipakita usab ni Oliva ngadto sa mga tigbalita ang print out sa mga text messages sa maong mga dinakpan nga nagpamatuod nga mihimo sila sa maong buhat ug labaw sa tanan nasakmit usab ang mga kagamitan alang sa pagpanglaglag og mga inosenteng anghel gikan sa mga sabakan sa inahan.