MAS suwerte pa ang mga bar ug mga establismento sa GenSan tungod hangtud alas 12 sa tungang gabii pa maka-operate itandi sa ubang lugar nga hangtud alas 10 lang sa gabii.
Kini ang gibutyag ni Geraldine Zamora, labaw sa City Permits and Licensing Office sa LGU-GenSan apan gikasubo niini tungod adunay wala gasunod sa curfew ug sa mga health protocols.
Sulod na sa pipila ka semana nga ginapulawan matud pa nila ang pag-inspeksyon aron sayron kung gisunod ang mga nalatid sa mga executive order sa mayor, hinungdan duha ang napasirado nga bar ug usa ka resort tungod sa kalapasan sa mga health protocols.
Gitino niini nga daghan ang nasuko na kaniya apan gihimo lang ang ilang trabaho tungod dili usab gustong masusama ang GenSan sa mga lugar sa kaulohan ug India nga sobra ang pagtaas sa kaso sa COVID-19.
Gihingusgan ni Zamora, wala untay problema kung musunod lang ang mga establismento sa mga health protocols ug curfew, ug sa mga napasiradhan nga bar ug resort, mahimo silang musulat sa IATF aron mohangyo nga dili na usbon ang bayolasyon ug mutuman na sa mga health protocols ingon man curfew.