Mga barangay sa Cebu City nga way transmission sa COVID-19, nagkadaghan

Padayong napun-an ang ihap sa mga barangay sa Cebu City nga giisip na nga COVID-19 free.

 Basi sa labing awahing datus nga gipagawas sa Emergency Operations Center (EOC)- Cebu City, misaka na sa 30 ka mga barangay sa syudad ang giingong wala na makatala ug transmission sa coronavirus sulod sa napulo na ka mga adlaw.

Gibutyag ni Cebu City Councilor Joel Garganera, ang deputy chief implementer sa EOC, nga sa kinatibuk-ang 80 ka mga barangay sa syudad, 50 na lang niini ang pabiling adunay aktibong kaso sa sakit.

Samtang ang nahabiling 30 ka lugar, diin kasagaran niini nahimutang sa bukirang barangay, wala na makatala ug mga bag-ong kaso sa virus sulod na sa napulo ka adlaw.

Bisan paman sa maong kalambuan, miawhag si Garganera sa publiko nga kanunayon gihapon ang pagsunod sa gipatumang health protocols.

 Sa Covid-19 case bulletin number 328 nga gipagawas sa Department of Health-7, aduna lay 43 ka mga bag-ong nadugang sa syudad.

Tungod niini, misaka na sa 23,793 ang total cases, diin 586 niini ang mga aktibo.

 Samtang ang mga naka-recover, misaka na sa 22,348 human naduganagan ug 59 ka mga bag-ong recoveries.         Ang mga namatay, miabot  na sa 859 human adunay natalang duha ka mga covid-19 related deaths.

Leave a Reply

Your email address will not be published. Required fields are marked *