Mga biktima sa sunog nakapahiyom na human nakadawat ug tabang sa lokal nga gobyerno apan aduna pay kulang

NAKAPAHIYOM na ang pipila ka biktima sa sunog sa Barangay Bula human nga nakadawat og hinabang gikan sa lokal nga panggobyerno sa General Santos City, hapon sa Marso 6 sa kasamtangan nga tuig.

Sumala kay OIC Punong Barangay Antonio Talle nga niadto ang mga opisyales sa syudad sa pagpanguna ni Mayor Lorelie Pacquaio pasado alas 4 sa hapon adlaw nga Lunes, Marso 6 kuyog ang ubang konsehal.

Ang 29 ka pamilya nakadawat sa managlahi nga kantidad sa tabang financial, adunay nakadawat og P15,000 ,adunay P10,000 ug adunay P5,000  nagadependi sa pagsusi sa panginahanglan pinaagi sa social workers.

Gidugang ni Talle nga sa ilang bahin wala pa sila nakahatag og ayuda nga salapi gikan sa ilang calamity fund kay ilaha pa ginapaabot ang ilang kapitan nga naa pa sa Cebu City kay nitambong sa usa ka panagtapok sa mga kapitan.

Sa kasamtangan temporaryo nga anaa nagtiner sa Barangay Bula gymnasium ang 29 ka pamilya nga biktima sa sunog.

Anaa pa usab fire line ang dapit nga nasunogan ug wala pa gipabalik ang mga tagbalay aron mopatukod balik sa ilang mga panimalay gumikan wala pa nahuman ang pagsusi sa taga Bureau of Fire Protection sa posibling hinungdan sa sunog.

Nahitabo ang sunog hapon kaniadtong Biyernes Marso 3, 2023 sa purok 4A, Rajah Muda, Barangay Bula. I Ver Diazon