GIPASARADO sa probinsiya sa Sarangani ang ilang mga opisina Martes ug gimanduan ang mga empleyado nga mo-stay at home “until further notice” human dunay nagpositibo sa Covid-19. Sa direktiba nga gipirmahan ni Sarangani Governor Steve Chiongbian Solon, gimandu niini ang pag-close usa sa pasilidad alang sa contact-tracing sa mga empleyado ug dis-infection sa mga buhatan sulod sa provincial capitol compound sa Alabel.
Apan gimanduan ni Solon ang mga empleyado nga naa ilawom sa front-line offices ug unit nga mopadayon sa regular nga pag-report sa trabaho.
Kini mao ang mga empleyado sa Provincial Jail, Provincial Security Group, Information and Communication Technology unit, provincial-run hospitals, electricians sa Provincial General Services Office, Provincial Disaster Risk Reduction and Management Office.
Apil ang mga empleyado nga nagmandu sa African Swine Fever ug Covid-19 checkpoints ug health workers nga dunay mandatu nga mohimo og programa aron mapugngan ang pagkatap sa sakit.
Wala napatik sa gipagula nga advisory kung pila ka empleyado sa ang na-infect sa Covid-19 ug walay gidetalye ang exposure sa mga nasangpit. Sa karon ang Sarangani ang dunay 29 ka active cases, mokabat sa 669 ang kinatibuk-ang confirmed cases, 18 related deaths ug 622 ang nakarekober sa sakit. ( Rich Gubalani)
Photo from Sarangani FB page