Masmiubos pa ang ihap sa mga bus nagnagabyahe paggawas ug pasulod sa syudad sa Davao gikan sa 800 ug karon anaa na lamang sa kapin 200 matag adlaw sukad gibalik ang hugot nga travel restrictions ubos sa Modified Enhanced Community Quarantine (MECQ).
Sumala kang Davao City Overland Transport Terminal (DCOTT) manager Aisa Usop, nakasinati na sa pagkalugi ang mga bus operators tungod sa gamayng byahe kada adlaw.
Dugtong niini nga gikan sa kanhi 50 ka pasahero anaa lang sa 25 ang mamahimong isakay kada byahe tungod sa 50 percent passenger capacity aron masunod ang physical distancing.
Pipila sa mga major bus companies nga naga-operate sa terminal mao ang Bachelor Express, Yellow Bus Line Inc., LCI Bus Line, ACF Bus Lines, Holy Infant Tours, Mindanao Star, ug Davao Metro Shuttle.
Nasayrag ayha ang COVID-19 pandemic, anaa sa average nga 800 byahe ang mahimo sa mga bus atol sa regular days samtang 1,600 sa peak days ilabi na sa Christmas holidays ug pag-obserba sa All Saints’ ug All Souls’ Days.
