Mga coconut farmers gipanawagan nga magparehistro sa National Coconut Farmers Registry System aron maka-avail sa benipisyo niini

Gipanawagan ni Philippine Coconut Authority Provincial Development Manager Engr. Serafin Auster Layog IV ang mga coconut farmers dinhi sa Negros Occidental nga magparehistro sa National Coconut Farmers Registry System.

Kini aron ma –update ug mabutang sila sa listings sa mga coconut farmers ug maka-avail sa mga benipisyo sa mga programang gilatid sa balaod nga alang kanila.

Matod pa ni Engr. Layog ang mga coconut farmers nga makaparehistro niini dili lamang kadtong mga nananom kundi gilangkuban kini sa mga farm owners, growers, tenants, ug farm workers ug gikatakdang makabenipisyo sa Coconut Farmers and Industry Trust Fund Act.

Mamahimo usab nga makaparehistro online pinaagi sa ilang website ug kung dili kabalo mangayo na lang ug form sa City/Local Agriculture’s Office sa ilang lugar.

Alang niadtong mga land owners nga may 50 ka punoan sa lubi o tunga sa ektarya ngadto sa 5 ka ektaryang kalubian kinahanglan magdala ug photo copy sa tax declaration , CLOA title ug 2×2 picture ug kung ikaw dunay 50 lang paubos nga punoan sa lubi magdala gihapon ug 2×2 aron makaparehistro.