LEGAZPI CITY – Mas dakol ang nanutarang mga dai nag-utob kan pig-implementar na price ceiling sa mga bagas sa Bicol Region kung ikukumpara duman sa mga nag-utob.
Segun ini kay Department of Trade and Industry (DTI) Bicol Consumers Protection head Ruben Sombon.
Sa intrevista saiya kan Brigada News FM Legazpi, sinabi kaini na ini an saindang naobserbaran asin nakompirmar kan sinda naglibot sa manlain-laing merkado sa rehiyon nganing magmonitor.
Sinabi niya, kasabay kaini an pagkondusir nin validation asin profiling sa mga retailers.
Sa ngunyan, dakol naman su boot sindang na-profile, alagad nagpapadagos pa ini huli ta dakol man an mga retailers sa rehiyon.
Mientrastanto, digdi sa probinsya kan Albay, kinumpira ni Sombon na igwa man ki mga nagsusunod sa price ceiling.
Alagad, dakol man ki dai pa nagasunod na sainda man na pigsasabot huli ta nabakal kan mga retailers an bagas sa alangkaw na kantidad kaya dipisil saindang ipabakal an mga ini sa hababa na kantidad.