Mga empleyado sa LGU GenSan may komento kalabot sa ilang paghulat sa ilang sweldo

PADAYON ang pag-atang sa mga empleyado sa Local Government Unit sa General Santos City kon aduna nay makalingkod nga City Treasurer aron nga makadawat na sila sa ilang sweldo sa Enero 15 nga payroll ug sa bulan sa Desyembre 2021 nga sweldo sa mga Job Order Workers.

Sa pahayag sa usa ka regular nga empleyado nga si Roland sumala niini nga malangay gayod ang ilang sweldo alang sa January 15, 2022 gumikan wala may moperma kay wala pay City Treasurer.

Sa normal daw nga pagdawat nila og sweldo ang petsa 15 madawat nila kini sa mga petsa 20 apan sa karon nga walay moperma sigurado nga malangay gayod ang ilang sweldo.

Sa pahayag usab sa usa ka Job Order Worker nga 13 ka tuig na nanarbaho sa LGU nga si Boyet, sumala niini nga concern siya sa tanan dili lang sa iyang kaugalingon.

Sumala ni Boyet nga ilang ginahulat ang ilang sweldo sa bulan sa Desyembre, nadungog usab daw niya nga may gituboy ang mayor ngadto sa Bureau of Local Government Finance kon BLGF apan wala usab nag- qualify.

Ang personal nga panglantaw ni Boyet nga dapat sa wala pa nagretiro si Rodilon Lacap nahan-ay na para dili sila ma apektohan, gihulagway ni Boyet nga muta siya ug buang nga nagahangad hangad sa ilang sweldo.

Sa paghimo sa mao nga balita gikumperma sa Assistant City Treasurer  nga si Zenaida Eturma buntag sa Enero 17, 2022 nga wala pay tig perma nga treasurer sa ilang buhatan. I Ver Diazon