Mga Job Order Workers sa City hall naga-agad lang sa kaluoy sa sunod nga administrasyon

NAGAPANAGANA na ang pipila ka mga Job Order workers sa City hall basin dili na sila ma-renew sa umaabot nga Hulyo gumikan bag-o na ang administrasyon apan malaumon sila nga unta makapadayon ang maayo og performance sa ilang duty.

Sa pahayag sa usa ka Job Order worker nga si Asher Villanueva nga mag siyam ka tuig na siya sa pagka-Job order worker sa Hulyo 22, 2022 kay nakatulo ka term siya sa mayor nga nagtrabaho.

Sa karon ang ilaha daw sitwasyon nagahulat lang sila kon unsa ang ikaluoy kanila sa bag-ong mupungko nga mayor, nagahangyo sila nga ikonsidera ang maayo og performance kay aminado usab siya nga aduna usab mga JO nga bolakbul sa trabaho.

Gidugang ni Villanueva nga ang ubang kaubanan niini nagarenta lang og balay samtang sa iyang bahin nga may edad na lisod na usab mag-apply og trabaho sa pribadong kompanya.

Samtang nagapanghinaut usab og dako ang pagtuo sa kanhi kapitan sa Barangay Bula nga si Eduardo Vargas nga may pagbati sa mga Job Order workers ang mopungko nga mayor ug dili kini pang tanggalon kondili ibasi sa agi sa ilang trabaho.

Malaumon usab si Vargas nga pun-an ni Mayor-elect Lorelie Pacqiao ang kakulangan ni Mayor Ronnel Rivera. I Ver Diazon