Mga kinhason sa Balite ug Mati Bay sa DavOr di pa luwas kaunon

Nagpabilin pa gihapon ang abiso sa Bureau of Fisheries and Aquatic Resources (BFAR) sa mga lugar sa nasud nga apektado pa gihapon sa red tide partikular ang pito ka lugar sa Visayas ug Mindanao.

Sa bag-ong update nga gipagawas, apektado pa gihapon ang kabaybayunan sa Dauis ug Tagbilaran City sa Bohol; Tambobo Bay sa Siaton, Negros Oriental; Daram Island, Zumarraga, Cambututay, Irong-irong, San Pedro, Maqueda ug Villareal Bays sa Western Samar.

Lakip na usab ang mga kadagatan sa Calubian, Carigara ug Ormoc Bay, Cancabato Bay sa Tacloban City, Leyte; Balite Bay ug Mati Bay sa Davao Oriental; Murcielagos Bay sa Zamboanga del Norte; Lianga ug Bislig Bays sa Surigao del Sur.

Subay matud pa sa ulahing pagtuon nga gihimo sa BFAR, positibo pa gihapon ang shellfish nga nakolekta sa mga naasoy nga lugar sa paralytic shellfish poison o ang toxic red tide.

Tanang matang sa shellfish bisan ang alamang nga makuha gikan sa maong mga lugar ang dili pa luwas konsumuhon sa tawo.

Samtang ang mga pusit, hipon ug alimango mamahimong kaunon apan kinahanglan nga lab-as, gilimpyuhan og tarong ug naluto og ensakto ayka konsumuhon. BNFM-DAVAO

Leave a Reply

Your email address will not be published. Required fields are marked *