Mga mag-uuma sa Cebu City miping-it na sa ting-init

Pipila ka mga mag-uuma na ang nakasinati og 60 porsiyento nga pagkunhod sa ilang mga abot gumikan sa init nga panahon.

        Tungod niini ang mga mag-uuma nangayo na og tabang gikan sa gobyerno sanglit misaka usab ang ilang gasto sa pagmentinar sa ilang mga umahan.

Gipadayag sa mga mag-uuma gikan sa bukirang bahin sa dakbayan nga naapektuhan na ang kalidad sa ilang mga utanon nga sama sa cauliflower, talong, okra, pepino, ug mga batong tungod sa ka-init sa panahon diin dili na usab kini mamahimong ibaligya sa taas nga presyo.

Ang Cebu City Agriculture Department (CAD) nangandam sa proposal nga mokabat sa P60 milyunes aron maprotektahan ang milyunes nga kantidad sa mga tanom nga gitikad sa dul-an sa 11,000 ka mga mag-uuma sa kabukiran sa dakbayan sa Sugbo.//