“Mga ospital sa Sugbo, nagkuwang lang ug mga personnel ug dili mga hospital beds

Gipahibawo sa Department of Health-7 nga nagkuwang ug mga medical personnel ang mga ospital sa Sugbo partikular na ang mga nurses.

Tungod niini, gibutyag ni DOH-7 Director Jaime Bernadas  nga mihangyo sila sa mga bag-ong mi-graduate nga motabang karung nagsagubang ang Sugbo sa lain na usab nga surge sa covid-19 cases.

Hinuon, giangkon ni Bernadas nga naglisud sila sa pagkombinsir karun sa mga nurses nga mo-abag kanila diin, sa 50 nila ka mga gi-hire, bugtong walo lang ang mi-apply hangtud kagahapon.

Gihimug-atan sa direktor nga ang kakuwang sa mga personnel ang hinungdan kung nganung dili na sila maka-akomodar ug mga pasyente bisan ug aduna pa silay mga bakanteng hospital beds ug mga lawak.

Natuki kini ni Bernadas human sa nag-trending nga sitwasyon sa usa ka pribadong ospital sa Sugbo diin nakita ang mga pasyente nga naglinya sulod sa ilang mga sakyanan gawas sa emergency rooms samtang gi-oxygen samtang aduna usab uban nga anaa naghigda gawas sa ospital ug naghuwat nga ma-akomodar.

Hinuon, na-atiman ra usab kini sa tambalanan, diin nakasud ra sila sa emergency room ug ang uban kanila na-admit na.

Samtang adunay ubang mga tawo nga mas mipili nalang una nga adto magpundo sa ilang panimalay samtang naghuwat nga adunay mabakanteng mga lawak hinungdan nga midagsa karun ang mga tawong mipalit ug mga oxygen tanks sa syudad.        Aduna usab ubang tawo nga tuyong mipalit sa mga oxygen tanks isip pagpangandam kung mo-grabe pa unya ang covid-19 situation sa syudad.