Opisyal nga giturn-over sa hiniusang kusog sa PLGU-Davao de Oro, Department of Interior and Local Government, Armed Forces of the Philippines, ug Philippine National Police ang financial ug livelihood assistance sa 44 ka kanhi rebelde nga mibalik na sa sabakan sa balaod.
Moabot sa P2,757,000 nga livelihood assistance gikan sa Enhanced Comprehensive Local Integration Program sa DILG ang nadawat isip tabang sa gobyerno sa pagsugod nila’g bag-ong kinabuhi kauban ang ilang pamilya ug komunidad.
Ang gitunol nga kantidad naglangkob sa inisyal nga tabang pinansiyal nga P15,000, P50,000 alang sa tabang panginabuhian ug bayad isip bugti sa mga armas nga gitahan
Ang maong turn-over gitambungan nila Gov. Jayvee Tyron L. Uy nga girepresentaran ni BM Macario Humol, DILG Provincial Director Noel Duarte, 1001st Bde Commander BGEN Bergante, 60IB – LTC Sarmiento, 25IB – LTC Muti, ug 28IB – LTC Bustamante.
Tumong sa maong programa ang pagkab-ot ug malahutayong kalinaw sa mga komunidad sa Davao de Oro nga kanhi naipit sa armadong kagubot.
Pinaagi sa maong programa inubanan sa pakig-alayon sa lain-laing ahensya sa gobyerno, sa security sector, ug sa mga non-government organizations, 823 na nga mga kanhi rebelde ang mibalik sa sabakan sa balaod.
113 usab ka conflict-affected areas ang gideklarang insurgency-cleared. Gikan sa pito ka NPA fronts kaniadtong 2016, mikunhod na lamang kini sa duha.