Mga residenteng magpapabakuna kontra COVID-19 sa isang distrito sa Thailand, pwedeng manalo ng “baka” bilang pa-premyo

Chiang Mai, THAILAND—  Sa kabila ng maigting na kampanya ng pamahalaan at ng DOH sa publiko kaugnay ng pagpapabakuna kontra COVID-19, marami pa rin ang nag-aalinlangan at takot na magpa turok ng bakuna hindi lamang sa Pilipinas kundi maging sa ibang panig ng mundo.

Kaya naman sa Mae Cham District sa Chiang Mai, Thailand, upang mahikayat ang mga residente na magpaturok ng bakuna kontra sa nasabing sakit ay naisip ng kanilang District Chief na magpa premyo ng “baka” sa mga magpapalista at tatanggap ng kanilang COVID-19 vaccine.

Ayon kay District Chief Boonlue Thammanurak, target ng kanilang komunidad na maturukan ang nasa 2,000 residente bawat linggo upang makamit ang “herd immunity” ngunit nang kanilang inanunsiyo ang pa-raffle sa mga magpapabakuna ay dinagsa sila ng mga residente at katunayan ay umabot sa mahigit 4,000 katao ang agad na nagpa rehistro upang mabakunahan.

Magtatagal ang nasabing pa-raffle mula ngayong buwan ng Mayo hanggang Disyembre ng kasalukuyang taon kung saan bawat linggo ay may residenteng mag-uuwi ng premyong “baka” liban pa sa pagkakaroon ng proteksiyon kontra sa coronavirus. || BNFM BICOL

Leave a Reply

Your email address will not be published. Required fields are marked *