‘Ang kasalanan ni Adan ay hindi na natin kasalanan.’
Ito ang ginawang pahayag ni Senador Robinhood Padilla nang matanong kung ano ba ang kanyang reaksyon para sa pag-alala ng ika-50 anibersaryo ng Martial Law bukas.
Ayon kay Padilla, mas makabubuti pang mag-‘move-on’ na lang tayo dahil hindi raw tayo maggo-‘grow’ kung patuloy pa rin nating iisipin ang isyu ng Batas Militar at ng rehimen ni dating pangulong Ferdinand Marcos Sr.
Hindi na raw kailangan pang mag-sorry ni Marcos Jr. dahil ang kasalanan ni Marcos Sr. ay hindi na kasalanan ng ating kasalukuyang Pangulong Bongbong Marcos.
Kung titingan nga raw ang Islamic faith, kahit na Catholic faith pa – hindi naman ipinasa ni Adan ang kasalanan niya sa atin.
‘Kung may kasalanan man ang dating pangulo, hindi po kasalanan ng anak ‘yun. Kahit po sa Islamic faith, Catholic faith, ‘yung kasalanan ni Adan, hindi naman kasalanan natin,‘ wika ng Senador
‘Pag ‘di tayo nakaalis diyan sa Marcos issue at martial law issue, kailan pa tayo mag-grow?’ dagdag pa nito.
Sinabi naman ni Senador Jinggoy Estrada na kung pagbabasehan ang milyung-milyong bumoto para kay Marcos Jr., mapatutunayan umanong minorya na lamang ang naniniwala sa mga pang-aabuso ng Martial Law.
‘What is there to apologize for? Mag move-on na tayo… Imagine, President got the highest number of votes in Philippine history, 31 million. Hindi pa ba sapat ‘yun?’ ani Estrada.
Para Kay Minority Leader Koko Pimentel, hindi dapat malimutan ng publiko ang ‘dark period’ na naransan ng mga biktima ng Batas Militar.
Aniya, kahit na hindi na mag-sorry ang Pamilya Marcos, basta ba’t makapagbigay man lang ito ng paliwanag sa mga survivor, at mga naulila ng mga Martial law victims.
‘Alalahanin natin na 50 years ago, a dark period descended upon our country because of the declaration of martial law.’ wika ni Pimentel.
#