Malipayon ang masobra 600 ka mga registered shellfish growers gikan sa coastal barangays sa syudad sang Roxas matapos nakabaton sang food packs halin sa gobyerno probinsyal kag Gerry Roxas Foundation.
Ang nasambit nga mga benepisyaryo ang apektado sang red tide.
Sa interview sang Brigada News FM Roxas City kay Tatay Berting, residente sang Brgy. Cagay sining syudad, iya ginpahayag nga tuman gid sila nga nabudlayan bangud liwat naman nga naapektuhan sang red tide ang ila palangitan-an kun sa diin nag-extra nalang ini anay bilang construction worker agud maka-income samtang ginadumilian pa ang pagkuha, pagbaligya kag pagkaon sang panginhason.
Nahibaluan nga ang mga nakabaton sang food packs ang napili man nga mangin benepesaryo sang DOLE-TUPAD Program agud may ara sila sang alternatibo nga pangabuy-anan samtang nagahulat nga madula ang Red Tide.
Tuman naman ang pasalamat sang mga nakabaton sang ayuda bangud dako gid ang mabulig sini sa ila pang-adlaw adlaw nga kinahanglanon kag mahagan-hagan na ang ila palaligban.
Ginpangunahan ni Capiz Governor Fredenil Castro kaupod sanday Mayor Ronnie Dadivas kag Paolo Roxas, GRF staff ang distribusyon sang nasambit nga ayuda.
Yara man ang presensya nanday Vice Governor James Magbanua, Board Member Thea Faith Reyes, Board Member Trina Almalbis, Vice Mayor Inday Teresa Almalbis kag mga katapo sang Sangguniang Panlungsod sang Roxas City. | Judy Ann Juare