Mga tourism destination sa Sarangani province alang lang usa sa mga Sarangan

GIBAWALAN usa ang mga dili taga-Sarangani Province nga makasulod sa mga tourism destination sa probinsya gikan Mayo 8 hangtud Mayo 31.

Subay kana sa bag-ong executive order ni Gov. Steve Chiongbian Solon nga nagpahugot pa sa border control sa Sarangani. Nagpabilin usab ang rekositos nga negatibong RT-PCR swab test result gikan sa mga lugar nga daghan pa ang gipang-COVID.

Walay gitugutan nga tapok-tapok sa daghang tao, gawas na lamang kung ang maong panagtapok ang may koneksyon sa mga kalihukan sa maayong panglawas, social services, kaluwasan ug seguridad.

Pwede kini kung 50% lang sa venue seating capacity ang gamiton. Kadtong adunay kasal, bunyag, haya o paglubong ug susamang aktibidad nga sobra 25 ka tao ang makatambong, ang gikinahanglan nga mangayo og pagtugot sa municipal task force aron ma-monitor ug matuman ang mga personal safety protocol.

Padayon ang mga panagtigum sa relihiyosong sektor apan gihangyo nga 30% lang usa sa ilang seating capacity ang pagagamiton.

Ug gikinahanglan nga mutuman gihapon sa minimum health measures sulod sa simbahan. Wala gibawalan ang mga ilimnong makahubog apan gidid-an ang pag-inum inum sa mga pampublikong lugar, hilabi na panahon sa curfew.

Gihangyo karon ni Solon ang mga kapitan, tanod, mga kagawad ug myembro sa BHERT nga dili mapul-an sa pag-ayuda sa mga taga-munisipyo sa pagpanguna sa mga mayor tungod sila man ang mas nasayod sa ilang barangay. Gimanduan sa Gobernador ang mga kapulisan, kasundaluhan ug uban pang law enforcement agency nga hugot ipatuman ang bag-ong executive order, alayon sa ordinansa sa probinsya. Kung diin pwedeng maka-multa hangtud P5-K ug ma-preso ang intensyon nga mulapas sa mga patakaran sa lokal nga panggamhanan ning nagpadayon nga pandemya.