Mga turistang halin sa NCR, padayon do pag-aeabutan sa Boracay; mga bumisita sa isla sa sueod it 20 diyas, masobra 16K

MALAY, AKLAN—Masobra 16,000 do mga turistang bumisita sa isla it Boracay sa sueod it 20 diyas humalin nga buksan ku June 1, 2021 sa mga lugar nga una sa general community quarantine (GCQ) “with heightened restrictions”.

Base sa datos nga ginpaguwa it Malay Tourism Office, umpisa ku June 1 hasta ku June 20, 2021, nagaabot sa 16,047 do mga nagbakasyon sa Boracay kung siin nagapanguna gihapon do mga taga-National Capital Region (10,220) ginasundan it taga-CALABARZON (3,519), taga-Central Luzon (1,172) ag 477 do mga Aklanons.

Sa nasambit nga datos, mas maabo man do naga-edad 13-59 anyos nga nag-agto sa isla ag kaabuan sa mga raya hay babaye.

Samtang, padayon man do padumdom it mga otoridad sa mga turista nga sundon do mga protocols nga ginapatuman sa Boracay ag likawan do pagpeke sa andang RT-PCR test. // SHERRY ANNE REUNIR-VIDAL