MGA VENDORS SA QUEEN TUNA PARK UG KATAPAD NGA LUGAR SUPAK NGA IBAWAL ANG PAGLIGO SA LEONS BEACH

NAGASUPAK ang pipila ka mga vendors sa Queen Tuna Park ug sa katapad nga dapit nga ibawal ang pagligo sa dagat gumikan sa impormasyon nga taas kini og porsyento sa hugaw.

Sumala sa tigpamaba sa Queen Tuna Vendors Association nga si Vicky Tiape nakabalik sila sa lugar unya subling namaligya gumikan nihangyo sila kay Kapitan Eliseo Garay kay wala silay panginabuhian human nga gipahawa sa taga City ENRO sa rason nga adunay dakung proyekto ang kanhi administration sa syudad.

Duha ka bulan na daw sila nga namaligya sa pagtugot sa Punong Barangay sa South ug ang ilang balos sa mao nga pagtugot mao usab ang pagpang hinlo sa baybayon matag adlaw.

Gidugang ni Tiape nga supak sila sa lakang nga ibawal ang pagpangaligo sa mga tawo sa Lions Beach nga karon gitawag nga Queen Tuna Park kay mawad-an sila ug panginabuhian,dugay na daw ang isyu sa Coliform Bacteria ug dapat nahatagan na kini og solusyon sa Local Government pinaagi sa opisina sa City ENRO.

Samtang nagpadayag usab sa ilang pagsupak nga ibawal ang pagligo sa Lions Beach ang laing vendors nga naa sa pribadong luna tapad sa Lions Beach.

Sumala kay Nick Salazar sa iyang kaugalingon nga panglantaw walay dakung risgo sa pagkaligo sa Lions Beach gumikan may mga senior citizens nga naga balik balik matag buntag,aduna usab mga na stroke nga naga ligo hantud sa pagsubang sa adlaw.

Kahibaluan nga nagpagawas ug advisory ang taga EMB ilawom sa DENR nga dili safe kaligoan ang Lions Beach gumikan sa taas nga coliform bacteria. I Ver Diazon

Leave a Reply

Your email address will not be published. Required fields are marked *