Pilason ang isa ka 45-anyos nga mister matapos ginlabo sang hubog nga lalaki sa Purok 6, Brgy. Aglalana, Dumarao, Capiz takna alas 4:40 kahapon sang Lunes, Setyembre 4.
Ginkilala ang napilasan kay Ronil Masero Sabio samtang ang suspek amo si Boni Papelera Lastimoso, 40-anyos lunsay mga residente sang nasambit nga lugar.
Sandig sa imbestigasyon sang Dumarao Municipal Police Station, samtang nagainom-inom sang makahulubog nga ilimnon ang biktima sa sulod sang ila balay kaupod si Arnel Lastimoso, hinali lang nag-abot ang suspek nga hubog kag ginlabo sa natuo nga abaga ang biktima.
Ginapahayag nga gintinguhaan pa nga ipalayo ni Arnel ang suspek apang liwat sini nga nalab-an ang biktima sa nawala nga braso.
Madasig naman nga nagpalagyo ang suspek matapos ang nakumiter nga krimen.
Samtang, ginpadangat naman sa Don Valerio Palmares District Hospital sa syudad sang Passi ang biktima para sa nagakaigo nga pagbulong. Sa karon, padayon ang hot pursuit operation sang mga kapulisan sa suspek kag kahulugbon ang ginalantaw nga motibo sa nasambit nga insidente.