GIKUMPIRMA mismo ni Idol Brigada Elmer Catulpos nga hapit na nga mahimong 100,000 ang mga miyembro sa KaBrigadahan GenSan.
Ang maong programa gimugna aron mahatagan og kagahum ang mga katawhan nga masinatian ang kalidad nga kinabuhi pinaagi sa pagtinabangay sa mga miyembro.
Sa maong ihap, giangkon ni Catulpos nga daghan pa ang mahatagan og tabang, tungod ang mga miyembro usab ang motabang sa isig ka miyembro nila nga nanginahanglan sama sa mga katawhan nga naigo sa pagbaha, nga apil naayodahan og bugas ug grocery items.
Niadtong Sabado, mokabat sa 50 ang natabangan nga nangayo og hospital ug mortuary assistance ug hugot nila kining gipasalamatan.
Sa programa niadtong Sabado personal nga nakahinabi nilang Idol Brigada Elmer Catulpos ug Atty.Kan Balleque ang mga personalidad nga nagatabang sa KaBrigadahan GenSan.
Lakip dinhi silang Atty Jay Omila, Atty.Art Cloma, Kagawad Mike Tanzo sa Lagao, kanhi Cong ug Mindanao Development Authority kun MinDa chair Lu Antonino, Kagawad Abel Sosobrado, Digoy Tan, anak sa fishing magnate Marfin Tan, Dyll Bartolaba, Virgile Llido ug mga miyembro sa KaBrigadahan GenSan labi na ang mga consistent nga gatabang.
Silang tanan ang pareho usab nagpadayag nga pinaagi sa pagtibangay sa tanan, dili malisod nga makab-ot ang tumong ug mabatukan kung unsa man ang mga problemang gisagubang, baha man kini o COVID-19.