Multicab operator sa Doña Soledad namahayag nga wala pay nadawat bisan piso sa Libreng Sakay

WALA gayod nadawat ang pipila ka operators sa Multicab sugod bulan sa Enero sa programang Libreng Sakay sa Land Transportion Franchising and Regulatory Board kun LTFRB.

Sa pahayag sa usa ka operator gikan sa Doña Soledad, Barangay Labangal nga si Ester Dazo bisan piso wala pa sila nakadawat gikan sa programang Libreng Sakay mao nga matag hapon human sa byahe wala usab dala ang iyang bana nga maoy naga pamasada sa ilang multicab gikan sa Doña Soledad padulong sa downtown area.

Gidugang ni Ester nga swerte ang mga nauna nga nakadawat og P4,500 pesos ug P25,000 pesos human nagparehistro sa programa apan sila wala gayod silay nadawat.

Tungod niini nagapanghinaut sila nga mahatag na sa taga LTFRB ang bayad sa ilang serbisyo sa Libreng sakay.

Samtang ang Chairman sa Public Transport Alliance of GenSan nga si Robert Cang namahayag nga magpadayon sila hangtud Hunyo 30 human nadungog ang pasalig sa taga LTFRB.

Sumala kay LTFRB-12 regional director Renato Padua iyang ginapasalig nga mabayaran ang mga driver, operator ug kooperatiba sa kapin 1,500 ka unit gikan sa bus, jeepney, vans ug multicabs sa region-12 nga nagparehistro sa programang Libreng Sakay. ( Ever Diazon)

Leave a Reply

Your email address will not be published. Required fields are marked *