Naga-abot sa sobra 130 nga high risk contacts ag suspected cases ru gin paidaeom sa swab testing sa Municipalidad it Banga.
Gin komperma it local nga pamunu-an it Banga, nga gin paidaeom sa swab testing ru mga residente it barangay it Sigcay, Torralba, Libas, Sibalew, Linabuan Sur, Daja Sur, Jumarap, Cerrudo, Taba-ao, Muguing, Pagsanghan ag Polocate.
Kaabu-an sigun sa mga close contacts ay household members it Covid-19 patients.
Samtang, 1 man nga personnel it Banga Municipal Police Station ru nag positibo sa rapid antigen test nga sa makaron hay gin paidaeom eon sa isolation.
Padayon pang gina hueat ru resulta it 22 nga personnel it nasambit nga PNP Station dahil sanda hay naging close contacts it nag positibo.
Sa pinaka ulihing datos, naka record it 462 kompermadong kaso it COVID-19 sa nasambit nga municipalidad.//MARIVIC Y. ILIN