WALA na nadala pa sa usa ka amahan ang kwarta sa ilang balay nga gipadala sa iyahang asawa nga nagtrabaho-abroad nga iyahang gi-claimed sa usa ka pera padala human siya ‘gitulis’ ug gipatay sa Sitio Manlubog, Barangay Ipil, Carmen sa amihanang Sugbo kagahapon sa ala una sa kadlawn, Huwebes, Marso 02, 2023.
Ang biktima nga si Gilbert Albaño Basan, 41, residente sa maong dapit napalgan nga wala nay kinabuhi nga adunay tulo ka samad-dinunggaban sa dughan.
Matud ni Chief Master Sergeant Arniel Manos, case investigator gikan sa Carmen Police Station nga ang biktima pauli na sa ilang balay human sa trabaho dihang giatangan sa wa pa mailhing mamumuno sa usa ka libon nga dapit.
Dugang ni Manos nga kinahanglan nga biyaan sa biktima ang iyang motorsiklo kay ang ilang balay nahimutang sa bungtod ug ang bugtong paagi aron makaabot didto mao ang agi sa hilit ug hilum nga dapit.
Nagtuo si Manos nga tulis ang motibo sa insidente sanglit nahanaw na ang sling bag sa biktima nga adunay sulod nga P24,000.
Sa pagkutlo niini nga balita, pabiling gawasnon ang suspek.///
