REHAS ang gipadulngan sa mga sugarol nga natiklo sa mga otoridad sa may Purok 5, Brgy. Aguada, Ozamiz City, Misamis Occidental, kaniadtong Agosto 1 ning tuiga.
Matud pa nga nakadawat og taho ang kapulisan sa Ozamiz Police Station, sa usa ka nagpakabanang lungsuranon, diin adunay nagpahigayon og illegal nga sugal sa naasoy nga dapit, diin girespondehan gilayon kini hinungdan sa pagkatiklo sa mga suspek sa akto nga nagdula.
Giila ang mga dinakpang nga sila si JUNREI MUNDO OGAPAY, 41 anyos, ulitawo, empleyado building resources, ug residente sa naasoy nga lugar, si LEONORA TACTACON BELOY, 42 anyos, minyo, tigpamaligya sa personal koleksyon, ug residente sa Brgy. Tinago, Ozamiz City ug ang giilang si IRISH BACUSMO SARAGENA, 33 anyos, dalaga, walay trabaho ug residente sa Brgy. Aguada, Ozamiz City.
Nakumpiska gikan sa ilang posisyon ug kontrol ang duha (2) kabuok bangko, usa (1) ka lamesa, usa (1) ka gibutang sa mga kard sa pagdula, ug salapi nga mokabat sa 160 pesos.
Sa pagkakaron temporaryong nga gitanggong ang mga nahisgutan sa Ozamiz City Police station alang sa tukmang disposasyon ug alang sa pagpasaka sa tukma nga sumbong sa korte.-BNFM Oroquieta
