Gipasalig sa City Engineering Office (CEO) nga ilang ipadayon ang pagtukod sa nahugno nga tulay nga nahimutang sa Sitio Kibakak, Brgy. Malamba, Marilog Dist., ning syudad sa Davao.
Sa inisyal nga imbestigasyon sa CEO nga “construction method” ang gitudlong responsibla sa pagkahugmak sa nasangpit nga tulay sa milabay nga Hulyo 24, 2023.
Sumala ni Attorney Joseph Dominic Felizarta, officer-in-charge sa CEO nga nagpahigayon sila og joint inspection kauban ang Philippine Institute of Civil Engineers, Structural Engineers Association of Davao, Inc., ug Davao City Office of the Building Official (OCBO) sa milabay’ng Lunes.
Dugang pa ni Felizarta nga 59% pa lang ang completion sa maong tulay ug dili pa unta angayan nga paagian sa maong boom truck nga maoy gigamit sa pagtaod og panel sa tulay.
Apan sumala pa sa contractor, nga mao na ang ilang pamaagi sa pagtukod og tulay sukad pa sa una, gani duna sad silay gitaoran nga taas-taas pa sa tulay sa Sitio Kibakak apan wala man naunsa.
Hinoon, magpadayon ang imbestigasyon sa CEO sa tulay diin sa Agosto 7 nila ipagawas ang ilang final report kung duna bay tulobagon ang kontraktor sa maong proyekto.
Ang nasangpit nga proyekto ang joint venture sa O.G. Santos Construction ug Bojus Sun Builders & Supply Corporation, usa ka government-funded project diin mikantidad og P64 million nga matapos sa Enero 2024.
Sa pikas bahin, wala hinoon pasagdi sa lokal nga panggamhanan ang pamilya sa lima ka mga namatay atol sa pagkahugno ug gipanghatagan og ayudang pinansyal.