HUGOT ang pagbantay sa Department of Trade and Industry (DTI) sa Soccsksargen region sa makasupak sa Republic Act No. 11900, o Vaporized Nicotine and Non-Nicotine Products Regulation Act. Kini dungan sa gihimong inspeksyon sa DTI – Fair Trade Enforcement Bureau (DTI-FTEB) sa tibuok rehiyon.
Matud ni Mary Ann Morales, consumer protection division chief sa DTI-12, mahinungdanon ang maong balaud aron protektahan ang nagagamit og ‘vape’ batok dili maayong epekto niini sa panglawas. Dugang ni Morales gi-regulate usab sa maong balaud ang importasyon, promosyon ug advertisement sa maong produkto.
Dugang niini, gidili ang paggamit og vape ug e-cigarettes 100 meters gikan sa mga eskwelahan, parke ug uban pang laaganan nga sagad ginaadtoan sa mga bata.
Giangkon sa opisyal nga duna silay nabantayan nga mga online vape stores nga nakitaan nila og pagsupak sa maong balaud. Ang mosupal sa maong balaud ang pamultahon og P10, 000 o pagkabalhog og hangtud 30 kaadlaw.
Samtang ang pagbaligya niini sa mga minor de edad o makitang naggamit niini nga minor ang ilawom sa mga ginikanan sa intervention sa Department of Social Welfare and Development (DSWD) ug Department of Health (DOH) alang sa counseling. I Richel Gubalani