GIBUTYAG sa Special Joint Task Force Negros niadtong Miyerkules nga ang napatay nga suspek sa pagpatay niadtong Marso 4 kang Negros Oriental Governor Roel Degamo ug walo ka uban pa kay kanhi miyembro sa Communist Party of the Philippines-New People’s Army (CPP-NPA).
Giila ang napatay nga suspek nga si Arnil Labradilla sa Sitio Awang, Barangay Atotes sa lungsod sa Bindoy, Negros Oriental.
Giila si Labradilla base sa gibutyag sa ubang mga suspek nga nadakpan atol sa pursuit operations sa mga personahe sa militar ug kapulisan pipila ka oras human sa pag-atake, matod ni Maj. Cenon Pancito III, tigpamaba sa task force.
Napatay siya human giingong nisukol sa pagdakop ug nakigpinusilay sa mga tropa human sa labing menos 10 ka mga armadong lalaki ningsulod sa residential compound sa Degamo sa lungsod sa Pamplona ug gipusil ang gobernador lakip na ang daghang mga tawo nga didto aron mangayo og tabang.
Sa unom ka suspek nga gitumbok, si Pancito niingon nga upat na ang anaa sa kustodiya sa Department of Justice (DOJ), ug nakig-alayon na sa mga awtoridad. Ang ikalima nga suspek, kinsa ni-surrender, nagpailawom pa sa mga pamaagi sa imbestigasyon, samtang ang napatay nga kanhi rebelde gidala sa iyang yutang natawhan human gi-claim sa iyang mga ginikanan ang lawas.//Rennier ARACO JR
