Gibutyag ni National Bureau of Investigation(NBI-7) Director Rennan Augustus Oliva nga nanghulga si Negros Oriental Representative Arnolfo Teves Jr. kalabot sa e-sabong raid niadtong Septiyembre 16, 2022 sa lungsod sa Minglanilla, Cebu.
Matud ni Oliva atol sa ikatulong adlaw sa Senate hearing sa Degamo slay, si Teves nanghadlok kanila human sa ilang gihimong raid sa giingong negosyo niini.
Kahinumduman nga ang raid sa Septiyembre 16 niresulta sa pagkasikop sa duha ka gambling operators nga nag-organisar og e-sabong games sa Barangay Calajoan, Minglanilla.
Nasikop usab sa NBI-7 ang 37 ka mga empleyado sa e-sabong ug nasakmit ang P2.6 milyunes nga cash ug P2 milyunes nga kantidad sa video equipment ug mga computer nga gigamit sa online gambling.
Matod ni Oliva nga ilegal nga nag-operate ang sabungan nga ilang gironda sa Minglanilla sa Septiyembre 2022 tungod kay di rehistrado sa Philippine Amusement and Gaming Corp. (Pagcor).
Ang mga suspek gipasakaan og kasong kalapasan sa Republic Act 10175, o ang Cybercrime Prevention Act of 2012, ug Presidential Decree 449 (Cockfighting Law of 1974), apan nakapiyansa.//