Neg. Occ nagapanghanda sa pagsulod sang pagsulod sang monkeypox

Gintalakay sa ginhiwat nga pagsinapol sang Provincial Infectious Disease Action and Control Council ukon PIDACC sang Negros Occidental sadtong nagligad nga miyerkules ang nahanungod sa status sang balatian nga monkeypox kag ang mahimo pagahimu-on nga preparasyon pananglitan magsulod ang amo nga balati-an sa probinsya kag ang pagapatigayunon nga intervention.

Ginpahayag ni Provincial Administrator Atty. Rayfrando Diaz II nagapabilin sa isa lang sa gihapon ang recorded monkeypox case sa Pilipinas kag ini amo ang 31 anyos nga Filipino national nga nag-abot halin sa iban nga pungsod sadtong nagligad nga Hulyo 19.

Suno kay Diaz ang ila ginakabalak-an madamo sang mga Overseas Filipino Workers ukon OFW’s ang mahimo ma-expose sa amo nga balati-an ilabi na ang mga nagatrabaho sa South Africa.

Sa amo nga council meeting, gin-aprubahan ni Governor Eugenio Jose Lacson sandig sa rekomendasyon sang mga miyembro sang konseho, ang timprano nga paghanas sa mga staff sang molecular laboratory sang probinsya para sa pagpatigayon sang RT-PCR test para sa Monkeypox sa tion magasugod na ang bakasyon ukon pagpauli sang mga OFW’s sa pungsod.

Dugang pa ni Diaz , may kabudlayan ang pag-detect sa mo nga balati-an bangud masubra sa tatlo ka semana ang incubation perios antes mahibaluan nga ang isa ka persona ang nalatnan sang virus kag ang quarantine period magalawig sang tatlo ka bulan.

Ang PIDACC meeting gintambungan nanday Governor Lacson, Provincial Board Member Araceli Somosa, chairperson sang SP Committee on Health, DILG Negros Occidental Provincial Director Roselyn Quintana, Provincial Health Officer Dr. Ernell Tumimbang, Teresita Jalandoni Provincial Hospital Chief, Dr. Mary Ann Maestral, Provincial Disaster Management Program Head, Dr. Zeaphard Gerhart Caelian kag Dr. Jessica Fama sang PHO.