-Reymund Titong
KABANKALAN CITY, Negros Occidental — Ika duwa ang Negros Occidental sa may pinakamataas nga kaso sang dengue sa Western Visayas, sunod sa probinsya sang Iloilo.
Pahayag ni DOH-Western Visayas director Dr. Adriano Suba-an, gin-activate na nila ang mga “dengue fast lanes” sa mga rural health office kag mga ospital sa rehiyon, agud masiguro nga mahatagan sang nagakaigo nga pagbulong.
Sa datus nga ginbalhag sang Department of Health (DOH) sa Western Visayas, ang Negros Occidental ang may yara sang 580 ka kaso sang dengue, sa diin may na rekord nga tatlo ka napatay, as of June 22, 2024.
Sa bug-os nga rehiyon, ang probinsya sang Iloilo ang may pinakamataas nga kaso nga yara sa 1,194 kag may apat nga napatay, Aklan nga may 577 nga kaso sa diin may isa nga napatay, Capiz nga may 472 ka kaso kag isa nga napatay, Antique nga may 272 ka kaso, Iloilo City nga may 226 ka kaso, Guimaras nga may 190 ka kaso, kag syudad sang Bacolod nga may 159 ka kaso.
Sang Hunyo 16 tubtub 22, narekord sang DOH ang pinakamataas nga weekly nga kaso sang dengue nga nga lab-ot sa 360.
Sa sini nga datus, para sa bulan sang Hunyo, nag lab-ot na 4,030 ka kaso sang dengue nga may pulo nga napatay sa rehiyon, sa diin 25 porsyento ini nga mas mataas kun e-kumparar sa nabalhag sang ahensya sang tinalikdan nga tuig nga yara lang sang 3,213 ka kaso.*