Hugot na nga ipatuman sa Agosto 1 sini nga tuig ang City Ordinance No. 022-2023 ukon “No Helmet, No Driving Ordinance” sa palibot sa syudad sang Roxas.
Ini ang ginkumpirma ni Mr. Bucth “Buchoy” Andrada, hepe sang Traffic Management Unit (TMU) sang ma-interview sang Brigada News FM Roxas City.
Suno kay Andrada, ang nasambit nga ordinansa ang ginpermahan ni Mayor Ronnie Dadivas sadtong Hulyo 14 kag naghatag man sang 36 diyas ang Sangguniang Panlungsod agud makapreparar kag makabakal sang helmet ang mga motorista.
Apang ini pa gid ang ginpalawig bangud man sa pangabay ni City Councilor John Paul Arcenas, ang author sang amo nga layi.
Dugang pa ni Andrada, tinutuyo sang sini nga ordinansa nga maprotektahan ang mga motorista sa posible matabo nga disgrasya bangud sadtong nagliligad nga mga binulan asud-asod ang nagakatabo nga aksidente sa dalanon kag madamo na sang nadulaan sang kabuhi.
Ginpahayag man sini nga ginpanugyanan na nila ang mga naka-motor lakip na ang backrider nga sumugod sa Agosto 1 magapangdakop na sila sang mga wala naga-helmet.
Nagakadapat man suno diri nga standard ukon may tatak nga ICC ang helmet nga pagagamiton.
Mahimo naman nga pagamultahan ang sin-o man nga magbayolar sa tion nga iga-implementar na ang nasambit nga ordinansa.
Yari ang mangin penalidad:
1st offense -P500
2nd offense-P1,000
3rd offense -P3,000
4th and subsequent -P5,000. Samtang, otorisado naman ang Traffic Management Unit (TMU), Roxas City PNP kag City Ordinances and Regulations Enforcement (CORE) Unit sa pagpangdakop sa mga magalapas. | Judy Ann Juare