Nakuha ng defending champion National University ang unang Final Four spot sa UAAP Season 85 women’s basketball tournament matapos manatiling walang talo sa siyam na laro.
Ito ay matapos ilampaso ng NU ang Ateneo sa laban nito kahapon sa UST Quadricentennial Pavillion sa score na 74-60.
Nagtala si Camille Clarin ng 16 puntos, limang rebound, limang assist, at apat na steals upang pangunahan ang Lady Bulldogs sa nangunguna sa liga na 9-0 record at kanilang ika-105 sunod na panalo para sa isang tiyak na tiket sa semifinals.
Nag-ambag din ang NU bench mob sa pangunguna ni Gypsy Canuto na may 13 puntos. Si Ann Pingol ay may 11 puntos at pitong rebounds. Nag-ambag si Mikka Cacho ng 11 puntos, siyam na board, at dalawang steals, habang si Annick Edimo Tiky ay nag-post ng 10 markers at siyam na rebounds.
Pinuri ng unbeaten NU coach ang Ateneo rookie na si Kacey Dela Rosa, na nanguna sa Blue Eagles na may 16 points at 14 rebounds.
