KALIBO, AKLAN—Mas ginpatag-od do operasyon it mga negosyo, opisina ag pampublikong transportasyon sa probinsya it Aklan.
Base sa Executive Order No. 20 nga ginpaguwa ni Aklan Governor Florencio Miraflores, raya nga tikang hay agud nga maipatuman it mayad do pagstrikto sa hueag it tawo matapos nga ipaidaeom do probinsya sa modified enhanced community quarantine (MECQ).
Sa nasambit nga EO, ginapasugtan nga magbukas do mga business establishment umpisa it alas-6 it agahon hasta sa alas-4 ng hapon mag-eowas eamang sa mga public ag private hospital, pharmacies ag drug store, media establishments, ag mga may kaangtanan sa pagtao it serbisyo medical, funeral ag embalming services ag mga nagatao it proteksyon ag seguridad kapareho it security ag investigation services.
Tanan man nga mga private ag government offices hay ginapasugtan nga mag-operate halin it alas-8 it agahon hasta sa alas-4 sa hapon mag-eowas sa mga taeatapan it PNP, PNP-HPG, BFP, AFP, PCG, PDEA, NBI ag BI.
Samtang do biyahe mat-a it mga pampublikong saeakyan hay halin sa alas-5 it agahon hasta it alas-6 it gabii mag-eowas sa mga saeakyan nga ginagamit sa emergency, ag do mga bus nga nagaagi sa probinsya padueong sa kaiping nga probinsya kapareho it RORO vessel.
Ru nasambit nga bag-ong mandu hay epektibo kahapon ag kung sin-o man kara do madakpan nga owa nagasunod hay may pangaatubangon nga penalidad. // SHERRY ANNE REUNIR-VIDAL