P100M DA Funds ibulig sa mga mangunguma nga naapektuhan sang Bagyo sa Negros Occidental.

Nagalambot sa 100 milyunes pesos nga pundo ang natalana pagabatunon sang probinsya sang Negros Occidental halin sa Department of Agriculture Western Visayas bilang bulig para sa mga mangunguma naapektuhan sang bagyo Odette.

Ginpahayag ni DA Western Visayas Regional Executive Director Remelyn Recoter may yara sang Quick Response Fund (QRF) ang ila talatapan para sa Negros Occidental bilang bulig sa manugtanum sang humay, mais kag “high value crops” kag ang yara sa “livestock” kag “poultry industry”.

Ang talatapan sang DA Western Visayas may igapasulod nga pundo para sa Negros Occidental nagalambot sa kapin P36 milyunes kag ang nabilin sa P100 milyunes ang igapaagi pinaagi sa “procurement”.

Suno kay Recoter iya gin-‘follow-up’ kay Atty. Rayfrando Diaz II, Negros Occidental Provincial Administrator ang Memorandum of Agreement (MOA) kag ang resolusyon sang Sangguniang Panlalawigan nga naga-utorisar kay Gov. Eugenio Jose Lacson sa pagsulod sa amo nga kasugtanan upod sa ila talatapan para sa pagapatigayunon nga “downloading of funds”.

Ang DA Western Visayas sang damlag lang ang nakapanagtag na sang 5 mil pesos nga “Rice Farmers Financial Assistance” sa probinsya.

Nagalaum si Recoter sa subong nga bulan sang Marso ma- finalisar na ang mga pagsulundan agud mabaton na sang mga mangunguma ang dugang nga bulig finansyal halin sa ila talatapan pinaagi sa gobyerno probinsyal.

Si Director Recoter nag-abot sa syudad sang Bacolod sa pagbukas sang KADIWA ni Ani at Kita subong nga adlaw, Marso 7, 2022 sa Capitol Grounds. Ang kahiwatan ginapangunahan sang Department of Agriculture Western Visayas upod sa DA Regional Office XI (Davao) upod ang probinsya sang Negros Occidental.

Mga kilala nga prutas halin sa Davao kaangay sang durian, mangosteen, rambutan, pinya, kabugaw (pomelo) , marang, langka (jackfruit) , saging kag madamo ka iban pa ang mabakal diri.
Ang KADIWA ni Ani at Kita magalawig tubtub sa Marso 11, biyernes.