MOKABAT sa P4.2 million nga kantidad sa marijuana ang giibot sa mga kapulisan, kasundalohan ug sakop sa Philippine Drugs Enforcement Agency (PDEA) region-12 sa tulo ka plantasyon sa Tampakan, South Cotabato, Enero 17.
Segun ni Kath Abad, tigpamaba sa PDEA-12 anaa sa 21,000 ka mga punuan sa marijuana ang gipang-ibot sa usa ka upland barangay sa Tampakan pinaagi sa hiniusang pwersa sa PDEA sa rehiyon, kapulisan ug mga sakop sa 73rd Infantry Battalion, Philippine Army.
Gitaguan matud pa sa mga maisan ang maong mga marijuana sa usa ka cultivator nga nailhan sa pangalan nga Yatan Piang, nga karon gipangita human wala igkita atol sa maong operasyon.
Gipaniguro ni Abad nga ipasaka nila ang kaso batok kang Piang alang sa paglapas sa Comprehensive Dangerous Drugs of 2002.
Ang maong operasyon ang isip sumpay sa nahimong raid miaging tuig asa usa ka drug suspect nga naga-finance sa pagpananum og marijuana ang nasikop.
Photo by PDEA Regional OFfice XII