Giguba sa Bureau of Customs Port of Cagayan de Oro ang liboan ka mis-declared cigarettes nga mokantidad sa 50 million pesos sulod sa facility sa Terra Cycliq Corporation sa Brgy. Mantibugao, Manolo Fortich, Bukidnon.
Gi-ingon nga ang shipment dunay sulod nga 1,700 master cases o 85,000 reams sa sigarilyo. Naka-consigned kini sa Denian Dry Goods Trading nga miabot sa Mindanao Container Terminal (MCT) sa Tagoloan MisOr gikan sa China niadtong September 18, 2020 diin una kini nga gideklara isip office furniture.
Apan sa gihimo nga pagsuta sa Customs Examiner, kauban ang operatives sa Customs Intelligence Investigative Service, CDO Field Station and Enforcement and Security Service (ESS) CDO District, nahibal-an nga ang shipment nga duha ka containers, ilegal nga sigarilyo.
Ang destruction sa shipment, gipangunhan ni Atty. Elvira Cruz, District Collector of Collection District X ug Officer-in-Charge sa MCT ug uban pang opisyal.
Dugang pa nga ang nahisgutang kalampusan resulta sa padayon nga intelligence sharing kauban ang uban pang government agencies ug international intelligence community aron masiguro ang border protection batok smuggling.
Ang consignee sa shipment mag-atubang sa kaso nga paglapas sa Section 1400 o “Misdeclaration of Goods Description” of Republic Act No. 10863 o ang gitawag nga Customs Modernization and Tariff Act.